Ողջ աշխարհում

ՁԻԱՀ -ը (Ձեռքբերովի Իմունային Անբավարարության Համախտանիշ) ՄԻԱՎ-ի (մարդու իմունային անբավարարության վիրուս) կողմից հարուցված վիճակ է, երբ արյան սպիտակ գնդիկները` լիմֆոցիտները, ոչնչանում են, որի արդյունքում օրգանիզմը կորցնում է հիվանդության դեմ պայքարելու կարողությունը: ՁԻԱՀ-ը տարածվում է սեռական ճանապարհով, վարակված արյան միջոցով: Առաջին դեպքը ՁԻԱՀ-ով վարակվածության ԱՄՆ-ում գրանցվել է 1979թ.: 2009 թ.-ի տվյալներով աշխարհում շուրջ 40 մլն մարդ ապրում է դարի չարիք համարվող այդ վարակով: ՄԻԱՎ/ՁԻԱՀ-ի` գլոբալ ճգնաժամի վերաճած խնդիրը, աշխարհի բազմաթիվ երկրների թվում սպառնում է նաև Հայաստանին: Հաշվարկային տվյալներով ՀՀ –ում բնակվում է ՄԻԱՎ շուրջ 3000 վարակակիր: Աշխարհի տարբեր անկյուններում, անտեղյակությունից` դարի չարիքի զոհն են դառնում հազարավոր մարդիկ: Եթե հասարակությունը սկսի լիարժեք գիտակցել խնդրի էությունը և ձգտի լինել տեղեկացված` իրավիճակը կշտկվի: ՀՀ առողջապահության համակարգում 1989թ.-ին ստեղծվել է ՁԻԱՀ-ի կանխարգելման հանրապետական կենտրոնը, իսկ 1988-ին Հայաստանում գրանցվել է ՁԻԱՀ-ով վարակման առաջին դեպքը: Հայաստանում հասարակության իրազեկման և այդ կերպ խոցելի խմբերին պաշտպանելու հարցերով զբաղվում է Հայկական Կարմիր Խաչի ընկերությունը: Դեկտեմբերի 1-ը հայտարարված է ՁԻԱՀ-ի դեմ պայքարի համաշխարհային օր: Նպատակն է` խնդրի նկատմամբ գրավել հասարակության ուշադրությունն ու փորձել կանխարգելել: