Սահակ Սահակյանի թանգարանը գտնվում է Ստեփանավանի Սոս Սարգսյանի անվան  մշակույթի պալատում՝ ք․ Ստեփանավան Գ․ Նժդեհ փողոց թիվ 5 հասցեում: Այն իր դռները այցելուների առջև բացել է 2015թ-ին: 

Ինքնուս վարպետ ու ճանաչված արվեստագետ նկարիչ, խեցեգործ և քանդակագործ Սահակ Սահակյանը ծնվել է 1929 թ. Ստեփանավանում, հողագործի ընտանիքում, նրանց տունը Սլաբոդկա թաղամասի մոտակայքում է եղել, դեպի Սուրբ Նշան մատուռի ճանապարհին:

Նա ստեղծել է գրական կերպարների մի ամբողջ քանդակաշար, սպառիչ ու վառ բնութագրումներով, դեպքերի, բնավորությունների, կերպարների իսկական հանդես, որոնց բնորդները ապրում են Հովհաննես Թումանյանի , Հակոբ Պարոնյանի, Յարոսլավ Հաշեկի անմահ էջերում:

Վարպետը մշտապես առաջնորդվել է լոռեցի վարպետ Գալոյի պատգամով. «Ամեն մարդ պետք է իրենից հետո թողնի գեղեցիկ գործեր»: Այս պատգամին հավատարիմ` նա ստեղծագործական իր լիցքերի համար անսպառ ակունք է համարելՄեծն լոռեցու` Հովհաննես Թումանյանի կերպարները: «Նա, կարծես, կերպարները քանդակված քեզ է հրամցնում: Մնում է միայն կավը վերցնես ու քո ձեռքով քանդակես»,- ասում էր վարպետը:
 Իրոք որ,  մի իսկական մարդկային կատագերգություն՝ կավե մանրաքանդակների լեզվով:

Սահակի արվեստում շատ բան է թատրոն հիշեցնում,  հատկապես փայտե տիկնիկները,  զուգված, զարդարված մեր ազգային տարազներով:

Սահակ Սահակյանի ժառանգները իրենց հոր հրաշալի արվեստի գործերը նվիրաբերել  են Ստեփանավան համայնքին:

Սահակ Սահակյանը մահացել է 2010 թվականին։